مناجات

میرا یہ دل ہے سیاہ نامہ، دلِ سیاہ کو معاف کردے
میں تیرے در کا فقیر مولا، مجھے خدایا معاف کردے

جہاں جہاں بھی گیا ہوں مولا، وہاں سے لوٹا ہوں خالی دامن
تری ہی رحمت کا آسرا ہے، مجھے خدایا معاف کردے

شب و سحر کی وہ ساری گھڑیاں جو یادِ مولا سے خالی گزری
وہ سب گناہوں کی داستاں ہیں، مجھے خدایا معاف کردے

مجھے یقین ہے ترےکرم سے یہ دل کی دنیا بدل رہی ہے
بس ایک نظر کی ہے بات مولا، مجھے خدایا معاف کردے

تیرے کرم سے بدل بھی سکتے ہیں میرے کالے کار نامہ
اگر تو چاہے تو پَل میں مولا، مجھے خدایا معاف کردے

بروز محشر یہ ہو خدایا ، مجھے وہی ساتھ مل ہی جاے
جو تیرے محبوب بندے ہیں نا ، مجھے خدایا معاف کردے

یہ آرزو ہے کہ آخرت میں انہی کی صف میں کھڑا رہوں میں
انھیں کے صدقے مجھے بھی مولا، مجھے خدایا معاف کردے

گناہ گاروں کی بستی میں میں ، سب سے بڑھ کر خطا کیا ہوں
نظر میں آقا کے آ نہ جاؤں ، مجھے خدایا معاف کردے

میں آ گیا ہوں درِ ولی پر امیدِ رحمت لیے ہوئے اب
یہی وسیلہ، صہیب تیرا، مجھے خدایا معاف کردے

میرا یہ دل ہے سیاہ نامہ، دلِ سیاہ کو معاف کردے
میں تیرے در کا فقیر مولا، مجھے خدایا معاف کردے