ایک موڑ اور دل کا راستہ بدل گیا

ایک گاڑی ایک اسٹیئرنگ اور ایک خطرناک موڑ

ایک مرد سڑک پر گاڑی چلا رہا ہے

گاڑی مضبوط ہے انجن درست ہے بریک درست ہیں راستہ بھی صاف ہے اور اس کے ہاتھ میں اسٹیئرنگ ہے

اچانک سڑک دو طرف تقسیم ہوتی ہے

ایک طرف محفوظ راستہ ہے دوسری طرف گہری کھائی

وہ جانتا ہے کہ کھائی کس طرف ہے

وہ یہ بھی جانتا ہے کہ گاڑی کس طرف موڑنی چاہیے

لیکن وہ جان بوجھ کر اسٹیئرنگ غلط سمت میں موڑ دیتا ہے

گاڑی آہستہ آہستہ اسی طرف بڑھتی ہے

پہلے وہ چند فٹ جاتی ہے

پھر رفتار بڑھتی ہے

پھر واپسی مشکل ہوتی ہے

پھر ایک وقت آتا ہے کہ ڈرائیور چیختا ہے

گاڑی مجھے بچا کیوں نہیں رہی

لیکن گاڑی کا قصور کیا ہے

گاڑی تو وہی جا رہی ہے جس طرف اس کے ہاتھ نے اسٹیئرنگ موڑا تھا

اگر ڈرائیور جان بوجھ کر گاڑی کے اسٹیرنگ کو غلط سمت کھائی کی طرف موڑ دیتا ہے تو قانونِ قدرت کے تحت گاڑی اسی سمت میں چلی جائے گی اور حادثہ ہو جائے گا اب وہ ڈرائیور حادثے کا قصور وار خود ہے نہ کہ گاڑی بنانے والی کمپنی

یہی وہ مقام ہے جہاں قرآن کا ایک جملہ انسان کو اندر تک ہلا دیتا ہے

قرآن نے یہ نہیں فرمایا کہ پہلے اللہ نے ان کے دل ٹیڑھے کیے پھر وہ ٹیڑھے ہوئے

فرمایا

﴿فَلَمَّا زَاغُواْ أَزَاغَ ٱللَّهُ قُلُوبَهُمْ﴾

جب وہ خود ٹیڑھے ہوگئے تو اللہ نے ان کے دل بھی ٹیڑھے کر دیے

یہاں ایک بات سمجھنا بہت ضروری ہے

اللہ تعالیٰ کسی بندے پر ظلم نہیں فرماتے

بندہ جب حق سامنے آنے کے باوجود مسلسل انحراف اختیار کرتا ہے تو اس کے اس اختیار کے نتیجے میں محرومی آتی ہے

علامہ اقبالؒ کا یہ شعر:

قوتِ فکر و عمل پہلے فنا ہوتی ہے
پھر کسی قوم کی شوکت پہ زوال آتا ہے

یہاں انسان کے لیے ایک نہایت خوفناک حقیقت چھپی ہوئی ہے

ہدایت کا دروازہ بار بار کھلتا ہے مگر اگر انسان بار بار منہ پھیرتا رہے تو ایک وقت ایسا آتا ہے کہ حق کی طرف دیکھنے والا دل ہی کمزور پڑ جاتا ہے

ایک مریض جسے بیماری کا علم تھا مگر پرہیز سے دشمنی تھی

ایک مرد کو معلوم ہے کہ اس کو شوگر یا بلڈ پریشر کا مرض ہے

ڈاکٹر نے اسے میٹھی یا نمکین چیزوں سے پرہیز کا حکم دیا ہے

اسے معلوم ہے کہ کون سی چیز اس کے لیے نقصان دہ ہے

اسے یہ بھی معلوم ہے کہ کون سی چیز اس کے لیے مفید ہے

لیکن وہ جان بوجھ کر روزانہ پرہیز توڑتا ہے

کبھی کہتا ہے

آج کھا لیتا ہوں کل سے چھوڑ دوں گا

پھر کل آتا ہے

اور کل بھی وہی ہوتا ہے

رفتہ رفتہ وہ اپنی فکر و عمل خراب کرتا جاتا ہے

نتیجہ کے طور پر اس کی بیماری بڑھتی جاتی ہے جسم شدید متاثر ہوتا ہے اور علاج بھی مشکل محسوس ہونے لگتا ہے

اس سلبِ صحت کا ذمہ دار اس کا اپنا رویہ اور لاپروائی ہے

یہ مثال صرف سمجھانے کے لیے ہے دینی حقیقت یہ ہے کہ جس طرح جسم مسلسل غلط عادات سے متاثر ہوتا ہے اسی طرح دل بھی مسلسل گناہ ضد تکذیب اور حق سے اعراض سے متاثر ہوتا ہے

دل بھی بیمار ہوتا ہے مگر اس کی بیماری نظر نہیں آتی

ایک جسم بیمار ہو جائے تو آدمی فوراً ڈاکٹر کے پاس جاتا ہے

لیکن دل بیمار ہو جائے تو

نہ درد کی آواز آتی ہے

نہ بخار ناپا جاتا ہے

نہ ECG میں نظر آتا ہے

نہ کوئی زخم دکھائی دیتا ہے

بس آہستہ آہستہ

نماز بوجھ لگتی ہے

ذکر میں مزہ نہیں آتا

قرآن کھولنے کو دل نہیں چاہتا

نصیحت سن کر غصہ آتا ہے

گناہ کے بعد شرمندگی کم ہوتی جاتی ہے

اور ایک وقت ایسا آتا ہے کہ انسان گناہ کو گناہ سمجھنا بھی چھوڑ دیتا ہے

قرآن اسی کیفیت کو بیان کرتا ہے

﴿فِي قُلُوبِهِمْ مَرَضٌ فَزَادَهُمُ اللَّهُ مَرَضًا ۖ وَلَهُمْ عَذَابٌ أَلِيمٌ بِمَا كَانُوا يَكْذِبُونَ﴾

سورۃ البقرۃ 10

ترجمہ

ان کے دلوں میں بیماری ہے پھر اللہ نے ان کی بیماری اور بڑھا دی اور ان کے لیے دردناک عذاب ہے اس وجہ سے کہ وہ جھوٹ بولتے تھے

یہاں دل کی بیماری سے مراد محض جسمانی بیماری نہیں بلکہ باطن کا شک نفاق اور حق سے انحراف ہے مفسرین نے واضح کیا ہے کہ قلبی بیماری انسان کے ایمان و یقین اور اس کے عمل دونوں کو کمزور کرسکتی ہے

آج کا انسان بھی اسی امتحان میں ہے

آج ایک نوجوان کے موبائل میں ہزاروں دینی ویڈیوز موجود ہیں

وہ جانتا ہے

نماز فرض ہے

جھوٹ حرام ہے

نگاہ کی حفاظت ضروری ہے

والدین کی نافرمانی گناہ ہے

حرام کمائی نقصان دہ ہے

غیبت گناہ ہے

تکبر تباہ کن ہے

لیکن عجیب بات یہ ہے کہ

علم بڑھ رہا ہے مگر عمل کم ہو رہا ہے

یہاں انسان کو اپنے آپ سے ایک سوال کرنا چاہیے

کیا میں حق سے ناواقف ہوں یا حق کو جان کر اس سے بھاگ رہا ہوں

یہ دونوں چیزیں ایک نہیں ہیں

پہلی حالت میں آدمی کو علم کی ضرورت ہے

دوسری حالت میں آدمی کو اپنے دل کی اصلاح کی ضرورت ہے

خطرناک مرحلہ جب انسان اپنی خرابی کو خرابی سمجھنا چھوڑ دے

گناہ کی ابتدا میں دل کہتا ہے

یہ غلط ہے

پھر انسان گناہ کرتا ہے

پھر دوبارہ کرتا ہے

پھر عادت بن جاتی ہے

پھر عادت کے ساتھ دلیل بن جاتی ہے

پھر دلیل کے ساتھ دوسروں پر تنقید شروع ہوجاتی ہے

پھر ایک وقت آتا ہے کہ جس چیز پر کبھی شرمندگی ہوتی تھی اسی پر انسان فخر کرنے لگتا ہے

یہ وہ مقام ہے جہاں خطرہ صرف گناہ کا نہیں رہتا

دل کے بدل جانے کا خطرہ پیدا ہوجاتا ہے

قرآن کا یہ اصول اسی لیے انسان کو پہلے ہی خبردار کرتا ہے

﴿فَلَمَّا زَاغُواْ أَزَاغَ ٱللَّهُ قُلُوبَهُمْ﴾

پھر جب وہ خود ٹیڑھے ہوگئے تو اللہ نے ان کے دل بھی ٹیڑھے کر دیے

ہدایت صرف ملنا کافی نہیں اسے بچانا بھی پڑتا ہے

ہم اکثر دعا کرتے ہیں

یا اللہ مجھے ہدایت دے

مگر رسول اللہ ﷺ خود دل کے ثابت رہنے کی دعا کثرت سے فرمایا کرتے تھے

حضرت انس رضی اللہ عنہ فرماتے ہیں کہ رسول اللہ ﷺ کثرت سے یہ دعا فرمایا کرتے تھے

«يَا مُقَلِّبَ الْقُلُوبِ ثَبِّتْ قَلْبِي عَلَى دِينِكَ»

ترجمہ

اے دلوں کو پھیرنے والے میرے دل کو اپنے دین پر ثابت رکھ

دل ایک موسم کی طرح ہے

کبھی دل نرم ہوتا ہے

قرآن سن کر آنکھیں بھر آتی ہیں

اذان سن کر دل مسجد کی طرف کھنچتا ہے

کسی کی تکلیف دیکھ کر رحم آتا ہے

گناہ ہوجائے تو اندر سے آواز آتی ہے

اللہ سے معافی مانگو

لیکن اگر انسان اس آواز کو بار بار دباتا رہے تو ایک وقت آتا ہے کہ آواز بہت مدھم ہوجاتی ہے

پھر وہی گناہ سامنے آتا ہے

اور دل خاموش رہتا ہے

پھر دوسرا گناہ

دل خاموش

پھر تیسرا

دل خاموش

یہ خاموشی سکون نہیں ہوتی

یہ کبھی کبھی دل کی خطرناک بے حسی ہوتی ہے

مگر دروازہ ابھی بند نہیں ہوا

یہ مضمون مایوسی کے لیے نہیں ہے

قرآن کا مقصد انسان کو خوف میں دفن کرنا نہیں بلکہ خوف کے ذریعے جگانا ہے

اگر آپ کو اپنے دل میں ٹیڑھ محسوس ہوگئی ہے

تو یہ خود ایک نعمت ہے

اگر گناہ پر شرمندگی ہوتی ہے

تو یہ نعمت ہے

اگر نماز چھوٹنے پر دل دکھتا ہے

تو یہ نعمت ہے

اگر قرآن سے دوری کا احساس ہونے لگا ہے

تو یہ بھی نعمت ہے

کیونکہ مردہ دل کو اپنی موت کا احساس نہیں ہوتا

جس دل کو اپنی بیماری کا درد محسوس ہوگیا اس کے لیے علاج کی امید باقی ہے

ایک چھوٹا سا موڑ پوری زندگی بدل سکتا ہے

ایک شخص برسوں غلط راستے پر چلتا رہا

پھر کسی دن کسی نیک آدمی کی ایک بات دل میں اتر گئی

اس نے موبائل بند کیا

وضو کیا

دو رکعت نماز پڑھی

اور سجدے میں صرف اتنا کہا

یا اللہ میں بہت دور نکل گیا ہوں مگر واپس آنا چاہتا ہوں

کبھی کبھی اصلاح کا آغاز لمبی تقریر سے نہیں ہوتا

صرف ایک سچا اعتراف کافی ہوتا ہے

یا اللہ غلطی میری تھی

پھر آہستہ آہستہ

ایک گناہ چھوڑا جاتا ہے

ایک نماز درست کی جاتی ہے

ایک حرام نظر سے بچا جاتا ہے

ایک غلط دوستی ختم کی جاتی ہے

ایک حق واپس کیا جاتا ہے

ایک معافی مانگی جاتی ہے

ایک قرآن کی آیت دل سے پڑھی جاتی ہے

اور پھر وہ دل جس نے کبھی اندھیروں کو اپنا گھر سمجھ لیا تھا اسی دل میں روشنی اترنے لگتی ہے

اصل خوف یہ نہیں کہ میں آج کہاں کھڑا ہوں

اصل خوف یہ ہے کہ

اگر میں غلط سمت میں چلتا رہا تو کل میرا دل کس سمت میں ہوگا

آج گناہ کے بعد دل کانپتا ہے

الحمدللہ

اس کانپتے ہوئے دل کو بچاؤ

آج نصیحت سن کر شرمندگی ہوتی ہے

الحمدللہ

اس شرمندگی کو توبہ بنا دو

آج قرآن کی کوئی آیت دل کو چبھتی ہے

الحمدللہ

اس چبھن کو اللہ کی طرف واپسی کا راستہ بنا لو

کیونکہ کبھی کبھی انسان کی زندگی کا سب سے قیمتی لمحہ وہ ہوتا ہے جب اسے اپنی تباہی کا احساس ہوجاتا ہے

کہیں ایسا نہ ہو کہ راستہ سامنے ہو اور دل مڑ جائے

انسان راستہ کھو دے تو شاید نقشہ دیکھ کر واپس آ سکتا ہے

لیکن اگر دل ہی واپسی سے انکار کر دے تو

پھر قرآن کی یہ آیت صرف بنی اسرائیل کا واقعہ نہیں رہتی

یہ ہمارے لیے آئینہ بن جاتی ہے

﴿فَلَمَّا زَاغُواْ أَزَاغَ ٱللَّهُ قُلُوبَهُمْ ۚ وَٱللَّهُ لَا يَهْدِي ٱلْقَوْمَ ٱلْفَٰسِقِينَ﴾

ترجمہ

پھر جب وہ خود ٹیڑھے ہوگئے تو اللہ نے ان کے دل بھی ٹیڑھے کر دیے اور اللہ نافرمان لوگوں کو ہدایت نہیں دیتا

پس آج ہی اپنے دل سے پوچھو

میں حق سے دور کیوں ہوں

نماز میں دل کیوں نہیں لگتا

قرآن سے جی کیوں بھاگتا ہے

نصیحت مجھے کیوں چبھتی ہے

گناہ مجھے معمولی کیوں لگنے لگا ہے

اور اگر جواب ملے

کیونکہ میں نے خود اپنے دل کو بار بار دوسری طرف موڑا ہے

تو اسی لمحے پلٹ آؤ

سجدے میں گر جاؤ

آنسو نہ آئیں تو بھی رونے کی کوشش کرو

زبان سے کہو

یا مُقَلِّبَ الْقُلُوبِ ثَبِّتْ قَلْبِي عَلَى دِينِكَ

اے دلوں کو پھیرنے والے میرے دل کو اپنے دین پر ثابت رکھ

ہیں ایسا نہ ہو کہ آج تم حق سے صرف ایک قدم دور ہو

کل دو قدم

پھر دس

پھر اتنے دور کہ حق سامنے ہو مگر دل اسے حق ماننے کے لیے تیار نہ ہو

سب سے بڑا حادثہ یہ نہیں کہ انسان راستہ بھول جائے سب سے بڑا حادثہ یہ ہے کہ وہ غلط راستے پر اتنا آگے نکل جائے کہ اسے واپسی کا راستہ ہی اچھا نہ لگے

اور اس سے پہلے کہ دل واقعی مڑ جائے

اپنے رب کی طرف پلٹ آؤ